Në shikim të parë, gatimi i bukës mund të duket i komplikuar. Mbase keni provuar disa herë, dhe mundi ju ka shkuar huq, por kjo nuk është një arsye për t’u dorëzuar.
Përgatitja e bukës është aftësi që përmirësohet me kalimin e kohës, sa më shumë e provoni. Për fillestarët, që duan gatuajnë dhe të shijojnë bukë të freskët nga shtëpia, kemi disa këshilla praktike që do t’ju ndihmojnë gjatë këtij procesi.
Përbërësit : Për të përgatitur bukë, kryesisht na duhen këta përbërës: miell, ujë, maja buke, kripë dhe sheqer.
Uji – Ju mund të përdorni ujë rubineti për të gatuar bukë, por sigurohuni që nuk është shumë i ftohtë. Por, nëse përmban klor, nuk do ta ketë efektin e duhur, andaj duhet ta vloni, më pas ta lini të ftohet dhe ta përdorni.
Ujin po ashtu mund ta zëvendësoni me lëngje tjera si qumësht, jogurt ose ujin që e keni përdorur për të zier patatet. Nëse përdorni qumësht, sigurohuni që është i papërpunuar, sepse qumështi i përpunuar mund t’i shkatërrojë enzimat që i duhen maja bukës.
Mielli – Nëse jeni fillestar, ju rekomandojmë të filloni me miell të bardhë, pastaj të vazhdoni me lloje të tjera. Me kalimin e kohës, do të mësoheni të gatuani bukë të shijshme fare pa miell të bardhë. Nëse përdorni një lloj mielli të quajtur grano duro, i cili përmban më shumë proteina, atëherë buka do të jetë edhe më e shijshme.
Maja buke – Maja buke është përbërësi përgjegjës për shijen karakteristike të bukës. Brumi që vie ngadalë dhe për një kohë më të gjatë, krijon bukë të butë dhe të shijshme.
Nëse koha e ardhjes së brumit është e shkurtër, buka do të mbajë erë maja buke. Ju mund të përdorni maja të thatë, që është e gatshme në qese të vogla, por buka më e mirë gatuhet me maja të freskët në formë të kubeve të vogla.
Po ashtu, duhet t’i kushtoni rëndësi datave të skadimit, para se ta përdorni. Maja buke ka efekt më të mirë në temperaturat 30 deri në 35 °C, pra është e rëndësishme që përbërësit të jenë në temperaturë dhome, dhe të përdorni ujë të vakët.
Kripa : Kripa i jep shije bukës, dhe zgjedhja më e mirë konsiderohet kripa e detit, sepse përmban minerale. Kripa rregullon rritjen e majas, andaj është e rëndësishme që mos t’i vendosni të gjithë përbërësit përnjëherë në të njejtën enë. Nëse po gatuani bukë me miell gruri apo miell grami, përdorni më shumë kripë, sepse do t’ia shtojë shijen bukës.
Sheqeri : Sheqeri ndihmon në aktivizimin e majas. Pa sheqer, majas i duhet më shumë kohë për të filluar me përpunimin e niseshtes në miell, dhe ardhja e brumit mund të vonojë. Përdorni sheqerna të lëngshme, sikurse shurup panje, mjalti ose melasa, apo edhe sheqer të kristalizuar.
Përgatitja : Ashtu siç i kushtoni rëndësi përbërësve, duhet t’i kushtoni rëndësi edhe secilës fazë të përgatitjes, në mënyrë që ta gatuani një bukë të përsosur.
Përzierja e brumit
Të gjithë përbërësit duhet të jenë në temperaturë dhome, sepse nëse janë të ftohtë, maja nuk rritet. Kripën dhe vajin duhet t’i shtoni të fundit, para se ta trazoni brumin.
Trazimi i brumit
Kur të filloni, brumi do të ngjittet, por sa më shumë që e trazoni, aq më i butë dhe më elastik do të bëhet. Si ta dini që është gati? Kur të jetë i butë dhe nuk ngjitet. Ka disa mënyra për ta trazuar brumin. Më e zakonshmja është ta shtyni gungën e brumit poshtë dhe tutje nga vetja, me të dy duart, pastaj ta rrotulloni dhe ta përsërisni procesin disa herë. Trazimi i brumit duhet të zgjasë 5-8 minuta.
Ardhja e brumit
Procesin e ardhjes së brumit duhet ta mbikëqyrni me kujdes. Nëse brumi ka ardhë shumë shpejt, buka nuk do të ketë shije shumë të mirë. Nëse brumi nuk vjen si duhet, buka për shembull mund të jetë më e fortë. Sa më i ftohtë të jetë ambienti dhe përbërësit, aq më shumë do të vonojë ardhja e brumit.
Në çfarëdo rasti, ardhja e brumit nuk duhet të jetë më e shkurtër se 30 minuta. Dhe si ta dini që është gati? Shty peni me gisht – nëse brumi nuk zhytet dhe vrima e bërë më gishtin tuaj mbetet në brum – është gati. Por nëse vrima mbulohet, nënkupton që ardhja e brumit ka zgjatur më shumë se që duhet.
Pjekja – Pjekja e shndërron brumin në një bukë të shijshme dhe me aromë të mrekullueshme. Pasi buka të jetë pjekur, aroma e këndshme shpërndahet gjithandej prej furrës. Para se ta piqni, brumin e vendosur në tepsi, mund ta shponi me pirun.
Gjatë pjekjes, mund ta hapni furrën kohë pas kohe për ta kontrolluar nëse është gati. Zakonisht piqet për 25-30 minuta. Nëse e vendosni një enë të vogël me ujë në fund të furrës gjatë pjekjes, korja e bukës do të jetë më e mirë, më e freskët. Ose edhe mund ta spërkatni furrën me pak ujë, para se ta vendosni bukën për t’u pjekur.
Temperatura për pjekjen e bukës varen nga lloji i furrës, po ashtu edhe programi. Nëse jeni duke përdorur ventilim, temperatura optimale është rreth 180°C, kurse në një program të rregullt, është rreth 200 °C – 225 °C.
Ftohja
Pasi ta nxirrni bukën e pjekur nga furra, mbështilleni me një leckë të pastër kuzhine dhe lëreni të ftohet. Në këtë mënyrë, pjesa e poshtme e bukës nuk do të jetë e lagësht dhe e ngjitshme.
Mbase shumica duam ta hamë bukën e nxehtë, por sigurohuni që është ftohur sa duhet para se ta preni, sepse mund të ngjiten për thi kë apo të shkërmoqet.
Gatimi i bukës nuk është i komplikuar, por kërkon shumë vëmendje. Nëse herat e para dështoni, mos u dorëzoni – me kalimin e kohës, ju do të bëni përvojë dhe do jeni në gjendje të gatuani bukë cilësore dhe të shijshme!