Bujar Asqeriu
Bujar Asqeriu, një nga figurat më të dashura të skenës dhe kinemasë shqiptare, festoi së fundmi ditëlindjen e tij.
Aktori i njohur mbushi 69 vjeç, duke e shënuar këtë moment me një mesazh të thjeshtë, por plot mirënjohje:
“Faleminderit o Zot…”
Lindur më 13 gusht 1956 në Vlorë, Asqeriu u diplomua si aktor në Akademinë e Arteve në Tiranë dhe për shumë vite ishte pjesë e Teatrit “Petro Marko” në qytetin e lindjes.
Karriera e tij përfshin role të paharrueshme në kinematografi dhe teatër, si ai i Telos në filmin “Njeriu i mirë” apo Avni Rustemit në “Një emër midis njerëzve”.
Në ditën e tij të veçantë, ai u përgëzua nga familja, miqtë dhe një numër i madh admiruesish që e kanë ndjekur e vlerësuar ndër vite.
Me thjeshtësinë që e karakterizon, Asqeriu na rikujtoi se mirënjohja dhe modestia janë vlera që e bëjnë njeriun të madh edhe përtej skenës.