Pas një fillimi jave me reshje të lehta shiu, kryesisht në jug dhe qendër të vendit, moti pritet të përmirësohet ndjeshëm duke nisur nga e mërkura.
Sipas parashikimeve, reshjet do të vijojnë vetëm gjatë natës së sotme dhe paradites së nesërme, por me intensitet të ulët.
Në veri dhe veri-perëndim mund të ketë rrebeshe afatshkurtra gjatë mesnatës, ndërsa pjesa tjetër e territorit do të ketë vetëm pak pika shiu.
Nga mesdita e nesërme, kushtet e motit do të stabilizohen dhe pritet që e mërkura, e enjtja dhe e premtja të jenë kryesisht me diell.
Temperaturat do të jenë tipike për fund-tetor, me mëngjese të freskëta dhe mesditë të ngrohta.
Të mërkurën në mëngjes priten minimale deri në 3°C në zonat veriore dhe verilindore, ndërsa gjatë ditës vlerat do të ngjiten deri në 20°C në zonat bregdetare dhe fushore.
Nga e enjtja, pritet një rritje graduale e temperaturave, duke arritur deri në 25–26°C në fundjavë.
Kjo periudhë me mot të kthjellët dhe të ngrohtë pritet të zgjasë për pesë deri në gjashtë ditë, duke i dhënë vendit një “frymëmarrje” të butë para rikthimit të tipareve dimërore në fund të nëntorit.
Meteorologët paralajmërojnë se pas kësaj periudhe të ngrohtë, 5-ditëshi i fundit i muajit mund të sjellë reshje më të dendura dhe ulje të ndjeshme temperaturash, me shenja të para të dimrit. Deri atëherë, shqiptarët do të shijojnë disa ditë me diell dhe temperatura të larta për stinën.