Viti 2025 mund të konsiderohet pa mëdyshje si një nga vitet më të dhimbshme për Shqipërinë.
Brenda pak muajsh, vendi humbi figura të rëndësishme të politikës, artit, kulturës, kinemasë, muzikës dhe medias, duke e lënë shoqërinë shqiptare më të varfër në vlera dhe trashëgimi shpirtërore.
Këta personalitete, për dekada me radhë, kontribuuan në ndërtimin e identitetit kulturor, institucional dhe publik të vendit.
Janar
25 janar – Anastas Janullatos (95 vjeç)
Kryepeshkop i Tiranës, Durrësit dhe i Gjithë Shqipërisë. Një figurë me ndikim të madh në Kishën Ortodokse Shqiptare, shpeshherë edhe në qendër polemikash për shkak të origjinës së tij etnike.
Mars
9 mars – Andis Harasani (53 vjeç)
Ish-deputet i Partisë Socialiste dhe ish-drejtues i KESH-it. Një figurë e rëndësishme e sektorit energjetik dhe politikës shqiptare. Ndërroi jetë në New York pas një sëmundjeje të rëndë.
Prill
3 prill – Margarita Xhepa (93 vjeç)
Ikonë e teatrit dhe kinemasë shqiptare, me një karrierë mbi tetë dekada. U nda nga jeta një ditë pas ditëlindjes së saj.
Maj
23 maj – Artan Lame
Publicist, historian dhe studiues i trashëgimisë kulturore. Vdiq në Gjermani pas komplikacioneve shëndetësore.
24 maj – Piro Milkani (86 vjeç)
Një nga kolosët e kinematografisë shqiptare, me mbi 20 filma që mbeten themel i kulturës sonë filmike.
Qershor
11 qershor – Leka Bungo (81 vjeç)
Regjisor, aktor dhe skenarist i njohur, një nga figurat më të dashura të ekranit dhe teatrit shqiptar.
Korrik
23 korrik – Violeta Sekuj (94 vjeç)
Aktore e shquar e teatrit shqiptar, me role të paharrueshme në skenë.
Gusht
28 gusht – Naun Shundi (66 vjeç)
Aktor, regjisor dhe dramaturg, që luftoi me një sëmundje të rëndë.
Gusht – Artur Zheji (64 vjeç)
Gazetar dhe analist i njohur, një zë i rëndësishëm i medias shqiptare për dekada.
Shtator
1 shtator – Dhimitër Anagnosti (89 vjeç)
Një nga regjisorët më të mëdhenj shqiptarë të shekullit XX.
22 shtator – Enver Petrovci (71 vjeç)
Ikonë e filmit dhe teatrit shqiptar e kosovar, me kontribut të jashtëzakonshëm edhe në arsimimin artistik.
29 shtator – Luiza Çako (88 vjeç)
Soprano e shquar e muzikës klasike shqiptare.
Tetor
30 tetor – Dorian Kongoli (47 vjeç)
Djali i shkrimtarit Fatos Kongoli, autor dhe oficer policie në New York.
31 tetor – Fatos Nano (73 vjeç)
Ish-kryeministër i Shqipërisë dhe figurë kyçe e tranzicionit politik. U nderua me funeral shtetëror.
Nëntor
26 nëntor – Shpat Kasapi (40 vjeç)
Këngëtar i njohur shqiptar, u nda papritur nga jeta në Itali, duke tronditur opinionin publik dhe skenën muzikore.